Час третий
Иерей: Благословен Бог наш, всегда, ныне и присно и во веки веков.
Чтец:
Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Трисвятое
Слава: И ныне:
Пресвятая Троице…
Господи помилуй (3 раза)
Слава: И ныне:
Отче наш…
Иерей: Яко Твое есть Царство Отца, и Сына, и Святаго Духа, и ныне и присно, и во веки веков.
Чтец: Аминь.
Господи, помилуй. (12 раз)
Слава: И ныне:
Приидите, поклонимся Цареви нашему Богу. (Поклон)
Приидите, поклонимся и припадем Христу, Цареви нашему Богу. (Поклон)
Приидите, поклонимся и припадем Самому Христу, Цареви и Богу нашему. (Поклон).
Псалом 16:
Услыши, Господи, правду мою, вонми молению моему, внуши молитву мою не во устнах льстивых. От лица Твоего судьба моя изыдет, oчи мои да видита правоты. Искусил eси сердце мое, посетил eси нощию, искусил мя eси, и не обретеся во мне неправда. Яко да не возглаголют уста моя дел человеческих, за словеса устен Твоих аз сохраних пути жестоки. Соверши стопы моя во стезях Твоих, да не подвижутся стопы моя. Аз воззвах, яко услышал мя eси, Боже, приклони ухо Твое мне и услыши глаголы моя. Удиви милости Твоя, спасаяй уповающыя на Тя от противящихся деснице Твоей. Сохрани мя, Господи, яко зеницу oка, в крове крилу Твоeю покрыеши мя. От лица нечестивых острастших мя, врази мои душу мою одержаша. Тук свой затвориша, уста их глаголаша гордыню. Изгонящии мя ныне обыдоша мя, oчи свои возложиша уклонити на землю. Объяша мя яко лев готов на лов и яко скимен обитаяй в тайных. Воскресни, Господи, предвари я и запни им, избави душу мою от нечестиваго, oружие Твое от враг руки Твоея. Господи, от малых от земли, раздели я в животе их, и сокровенных Твоих исполнися чрево их, насытишася сынов, и оставиша останки младенцeм своим. Аз же правдою явлюся лицу Твоему, насыщуся, внегда явити ми ся славе Твоей.
Псалом 24:
К Тебе, Господи, воздвигох душу мою, Боже мой, на Тя уповах, да не постыжуся во век, ниже да посмеют ми ся врази мои, ибо вси терпящии Тя не постыдятся. Да постыдятся беззаконнующии вотще. Пути Твоя, Господи, скажи ми, и стезям Твоим научи мя. Настави мя на истину Твою, и научи мя, яко Ты еси Бог Спас мой, и Тебе терпех весь день. Помяни щедроты Твоя, Господи, и милости Твоя, яко от века суть. Грех юности моея, и неведения моего не помяни, по милости Твоей помяни мя Ты, ради благости Твоея, Господи. Благ и прав Господь, сего ради законоположит согрешающым на пути. Наставит кроткия на суд, научит кроткия путем Своим. Вси путие Господни милость и истина, взыскающым завета Его, и свидения Его. Ради имене Твоего, Господи, и очисти грех мой, мног бо есть. Кто есть человек бояйся Господа? Законоположит eму на пути, eгоже изволи. Душа eго во благих водворится, и семя eго наследит землю. Держава Господь боящихся Его, и завет Его явит им. Очи мои выну ко Господу, яко Той исторгнет от сети нозе мои. Призри на мя и помилуй мя, яко единород и нищ есмь аз. Скорби сердца моего умножишася, от нужд моих изведи мя. Виждь смирение мое, и труд мой, и остави вся грехи моя. Виждь враги моя, яко умножишася, и ненавидением неправедным возненавидеша мя. Сохрани душу мою, и избави мя, да не постыжуся, яко уповах на Тя. Незлобивии и правии прилепляхуся мне, яко потерпех Тя, Господи. Избави, Боже, Израиля от всех скорбей eго.
Псалом 50:
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе Единому согреших и лукавое пред Тобою сотворих, яко да оправдишися во словесех Твоих, и победиши внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на oлтарь Твой тельцы.
Слава: и Ныне:
Аллилуиа, аллилуиа, аллилуиа, слава Тебе, Боже. (Трижды)
Господи, помилуй. (Трижды)
Слава:
Тропарь праздника. Если тропарей два, читаются оба, Слава: произносится перед вторым.
И ныне:
Богородичен:
Богородица, Ты – лоза истинная, возрастившая нам Плод живота, Тебя молимся, Владычице, со святыми апостолы, помиловати души наша.
[Если Великий Пост – настоящий тропарь, глас 6 со стихами (Пс 50: 12, 13) и тремя земными поклонами. Иерей возглашает тропарь и два стиха, а народ, отвечая ему, трижды поет тропарь; при этом совершаются три земных поклона.
Господи, иже Пресвятаго Твоего Духа в третий час Апостолом Твоим низпославый: Того, Благий, не отыми от нас, но обнови нас, молящих Ти ся.
Стих 1: Сердце чисто созижди во мне, Боже, и дух прав обнови во утробе моей.
Стих 2: Не отвержи мене от лица Твоего, и Духа Твоего Святаго не отыми от мене.
Иерей: Слава Отцу, и Сыну, и Святому Духу.
Чтец: И ныне, и всегда, и во веки веков. Аминь.
Богородичен:
Богородице, Ты еси лоза истинная, возрастившая нам Плод живота, Тебе молимся: молися, Владычице, со святыми апостолы помиловати души наша.]
Чтец: Господь Бог благословен, благословен Господь день дне, поспешит нам Бог спасений наших, Бог наш, Бог спасати.
Трисвятое
Слава: И ныне:
Пресвятая Троице…
Господи помилуй (3 раза)
Слава: И ныне:
Отче наш…
Иерей: Яко Твое есть Царство Отца, и Сына, и Святаго Духа, и ныне и присно, и во веки веков.
Чтец: Аминь.
Кондак дня святаго, или праздника.
[Если пост, или нет кондака, читаются эти тропари, глас 8:
Благословен еси Христе Боже наш, Иже премудры ловцы явлей, низпослав им Духа Святаго, и теми уловлей вселенную, Человеколюбче, слава Тебе.
Слава:
Скорое и известное даждь утешение рабом Твоим, Иисусе, внегда унывати духом нашим, не разлучайся от душ наших в скорбех, не удаляйся от мыслей наших во обстояниих, но присно нас предвари. Приближися нам, приближися везде Сый, якоже со Апостолы Твоими всегда еси, сице и Тебе желающым соедини Себе, Щедре, да совокуплени Тебе поем и славословим Всесвятаго Духа Твоего.
И ныне:
Надежда, и предстательство, и прибежище христиан, необоримая стена, изнемогающим пристанище небурное, Ты еси Богородице Пречистая, но яко мир Спасающая непрестанною Твоею молитвою, помяни и нас, Дево Всепетая.]
Господи, помилуй. (40 раз).
Иже на всякое время и на всякий час, на Небеси и на земли, покланяемый и славимый, Христе Боже, Долготерпеливе, Многомилостиве, Многоблагоутробне, Иже праведныя любяй и грешныя милуяй, Иже вся зовый ко спасению обещания ради будущих благ. Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти и избави нас от всякия скорби, зол и болезней, огради нас святыми Твоими Ангелы, да ополчением их соблюдаеми и наставляеми, достигнем в соединение веры и в разум неприступныя Твоея славы, яко благословен еси во веки веков, аминь.
Господи помилуй (3 раза)
Слава: И ныне:
Чтец: Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.
Именем Господним благослови, отче.
Иерей: Молитвами святых отец наших, Господи, Иисусе Христе, Боже наш, помилуй нас.
Чтец: Аминь.
[Если Великий Пост, иерей произносит молитву святого Ефрема Сирина:
Господи и Владыко живота моего, дух праздности, уныния, любоначалия, и празднословия не даждь ми.
Земной поклон
Дух же целомудрия, смиренномудрия, терпения, и любве, даруй ми рабу Твоему.
Земной поклон
Ей, Господи Царю, даруй ми зрети моя прегрешения, и не осуждати брата моего, яко благословен еси во веки веков, аминь.
Земной поклон
Боже, очисти мя грешного.
(12 раз и столько же поясных поклонов)
(Потом повторить всю молитву)
Господи и Владыко живота моего, дух праздности, уныния, любоначалия и празднословия не даждь ми.
Дух же целомудрия, смиренномудрия, терпения и любве, даруй ми рабу Твоему.
Ей, Господи Царю, даруй ми зрети моя прегрешения, и не осуждати брата моего, яко благословен еси во веки веков, аминь.
(И один земной поклон)]
Молитва святого Мардария:
Владыко Боже Отче Вседержителю, Господи Сыне Единородный Иисусе Христе, и Святый Душе, Едино Божество, Едина Сила, помилуй мя, грешнаго, и имиже веси судьбами, спаси мя, недостойнаго раба Твоего, яко благословен еси во веки веков, аминь.
Час шестой
Приидите, поклонимся Цареви нашему Богу. (Поклон)
Приидите, поклонимся и припадем Христу, Цареви нашему Богу. (Поклон)
Приидите, поклонимся и припадем Самому Христу, Цареви и Богу нашему. (Поклон).
Псалом 53:
Боже, во имя Твое спаси мя, и в силе Твоей суди ми. Боже, услыши молитву мою, внуши глаголы уст моих. Яко чуждии восташа на мя и крепцыи взыскаша душу мою, и не предложиша Бога пред собою. Се бо Бог помогает ми, и Господь Заступник души моей. Отвратит злая врагом моим, истиною Твоею потреби их. Волею пожру Тебе, исповемся имени Твоему, Господи, яко благо, яко от всякия печали избавил мя еси, и на враги моя воззре око мое.
Псалом 54:
Внуши, Боже, молитву мою и не презри моления моего. Вонми ми и услыши мя: возскорбех печалию моею и смятохся. От гласа вражия и от стужения грешнича, яко уклониша на мя беззаконие и во гневе враждоваху ми. Сердце мое смятеся во мне и боязнь смерти нападе на мя. Страх и трепет прииде на мя и покры мя тьма. И рех: кто даст ми криле, яко голубине, и полещу, и почию? Се удалихся бегая и водворихся в пустыни. Чаях Бога, спасающаго мя от малодушия и от бури. Потопи, Господи, и раздели языки их: яко видех беззаконие и пререкание во граде. Днем и нощию обыдет и по стенам eго. Беззаконие и труд посреде eго и неправда. И не оскуде от стогн eго лихва и лесть. Яко аще бы враг поносил ми, претерпел бых убо, и аще бы ненавидяй мя на мя велеречевал, укрыл бых ся от него. Ты же, человече равнодушне, владыко мой и знаемый мой, иже купно наслаждался еси со мною брашен, в дому Божии ходихом единомышлением. Да приидет же смерть на ня, и да снидут во ад живи, яко лукавство в жилищах их, посреде их. Аз к Богу воззвах, и Господь услыша мя. Вечер и заутра, и полудне повем, и возвещу, и услышит глас мой. Избавит миром душу мою от приближающихся мне, яко во мнозе бяху со мною. Услышит Бог и смирит я, Сый прежде век. Несть бо им изменения, яко не убояшася Бога. Простре руку свою на воздаяние, оскверниша завет Его. Разделишася от гнева лица Его, и приближишася сердца их, умякнуша словеса их паче елеа, и та суть стрелы. Возверзи на Господа печаль твою, и Той тя препитает, не даст в век молвы праведнику. Ты же, Боже, низведеши их во студенец истления, мужие кровей и льсти не преполовят дней своих. Аз же, Господи, уповаю на Тя.
Псалом 90:
Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится, обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя упова и избавлю и, покрыю и, яко позна имя Мое. Воззовет ко Мне и услышу eго, с ним есмь в скорби, изму eго и прославлю eго, долготою дний исполню eго и явлю eму спасение Мое.
Слава: И ныне:
Аллилуиа, аллилуиа, аллилуиа, слава Тебе, Боже. (Трижды)
Господи, помилуй. (Трижды)
Тропарь праздника. Если тропарей два, читаются оба,
Слава: произносится перед вторым.
И ныне:
Богородичен:
Яко не имамы дерзновения за премногия грехи наша, Ты иже от Тебе Рождшагося моли, Богородице Дево, много бо может моление Матернее ко благосердию Владыки. Не презри грешных мольбы, Всечистая, яко милостив есть и спасти могий, Иже и страдати о нас изволивый.
[Если Великий Пост – настоящий тропарь, глас 2 со стихами (Пс 54: 2, 17) и тремя земными поклонами. Иерей возглашает тропарь и два стиха, а народ, отвечая ему, трижды поет тропарь; при этом совершаются три земных поклона.
Иже в шестый день же и час, на кресте Пригвождей в раи дерзновенный Адамов грех, и согрешений наших рукописание раздери, Христе Боже, и спаси нас.
Стих 1: Внуши, Боже, молитву мою, и не презри моления моего.
Стих 2: Аз к Богу воззвах, и Господь услыша мя.
Слава: И ныне:
Богородичен:
Яко не имамы дерзновения за премногия грехи наша, Ты иже от Тебе Рождшагося моли, Богородице Дево, много бо может моление Матернее ко благосердию Владыки. Не презри грешных мольбы, Всечистая, яко милостив есть и спасти могий, Иже и страдати о нас изволивый.]
Скоро да предварят ны щедроты Твоя, Господи, яко обнищахом зело; помози нам, Боже, Спасе наш, славы ради Имене Твоего, Господи, избави нас и очисти грехи наша, Имене ради Твоего.
Трисвятое
Слава: И ныне:
Пресвятая Троице…
Господи помилуй (3 раза)
Слава: И ныне:
Отче наш…
Иерей: Яко Твое есть Царство Отца, и Сына, и Святаго Духа, и ныне и присно, и во веки веков.
Чтец: Аминь.
Кондак праздника.
[Если Великий Пост – тропари, глас 2:
Спасение соделал еси посреде земли, Христе Боже, на Кресте пречистеи руце Твои простерл еси, собирая вся языки, зовущия: Господи, слава Тебе.
Слава:
Пречистому образу Твоему покланяемся Благий, просяще прощения прегрешений наших, Христе Боже, волею бо благоволил еси плотию взыти на Крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
И ныне:
В понедельник, вторник и четверг – Богородичен:
Милосердия сущи источник, милости сподоби нас, Богородице, призри на люди согрешившия, яви яко присно силу Твою: на Тя бо уповающе, радуйся вопием Ти, якоже иногда Гавриил безплотных архистратиг.
В среду и пятницу – Крестобогородичен:
Препрославлена еси, Богородице Дево, поем Тя, Крестом бо Сына Твоего низложися ад, и смерть умертвися, умерщвленнии востахом, и живота сподобихомся, рай восприяхом, древнее наслаждение. Тем благодаряще, славословим яко державнаго Христа Бога нашего, и единаго Многомилостиваго.]
Господи, помилуй. (40 раз).
Иже на всякое время и на всякий час, на Небеси и на земли, покланяемый и славимый, Христе Боже, Долготерпеливе, Многомилостиве, Многоблагоутробне, Иже праведныя любяй и грешныя милуяй, Иже вся зовый ко спасению обещания ради будущих благ. Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти и избави нас от всякия скорби, зол и болезней, огради нас святыми Твоими Ангелы, да ополчением их соблюдаеми и наставляеми, достигнем в соединение веры и в разум неприступныя Твоея славы, яко благословен еси во веки веков, аминь.
Господи, помилуй. (3 раза).
Слава: И ныне:
Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.
Именем Господним благослови, отче.
Иерей: Молитвами святых отец наших, Господи, Иисусе Христе, Боже наш, помилуй нас.
Чтец: Аминь.
[Если Великий Пост, иерей произносит молитву святого Ефрема Сирина:
Господи и Владыко живота моего, дух праздности, уныния, любоначалия, и празднословия не даждь ми.
Земной поклон
Дух же целомудрия, смиренномудрия, терпения, и любве, даруй ми рабу Твоему.
Земной поклон
Ей, Господи Царю, даруй ми зрети моя прегрешения, и не осуждати брата моего, яко благословен еси во веки веков, аминь.
Земной поклон
Боже, очисти мя грешного.
(12 раз и столько же поясных поклонов)
(Потом повторить всю молитву)
Господи и Владыко живота моего, дух праздности, уныния, любоначалия и празднословия не даждь ми.
Дух же целомудрия, смиренномудрия, терпения и любве, даруй ми рабу Твоему.
Ей, Господи Царю, даруй ми зрети моя прегрешения, и не осуждати брата моего, яко благословен еси во веки веков, аминь.
(И один земной поклон)]
Молитва святого Василия Великого:
Боже и Господи сил и всея твари Содетелю, Иже за милосердие безприкладныя милости Твоея Единороднаго Сына Твоего, Господа нашего Иисуса Христа, низпославый на спасение рода нашего, и честным Его Крестом рукописание грех наших растерзавый, и победивый тем начала и власти тьмы. Сам, Владыко Человеколюбче, приими и нас, грешных, благодарственныя сия и молебныя молитвы и избави нас от всякаго всегубительнаго и мрачнаго прегрешения и всех озлобити нас ищущих видимых и невидимых враг. Пригвозди страху Твоему плоти наша и не уклони сердец наших в словеса или помышления лукавствия, но любовию Твоею уязви души наша, да, к Тебе всегда взирающе и еже от Тебе светом наставляеми, Тебе, неприступнаго и присносущнаго зряще Света, непрестанное Тебе исповедание и благодарение возсылаем, Безначальному Отцу со Единородным Твоим Сыном и Всесвятым, и Благим, и Животворящим Твоим Духом ныне, и присно, и во веки веков, аминь.
ЛИТУРГИЯ ОГЛАШЕННЫХ
Диакон: Благослови, владыко.
Иерей: Благословено Царство Отца и Сына, и Святаго Духа, ныне и присно, и во веки веков.
Хор: Аминь.
Ектения великая
Диакон: Миром Господу помолимся.
Хор: Господи, помилуй. (На каждое прошение)
О свышнем мире и спасении душ наших, Господу помолимся.
О мире всего мира, благостоянии святых Божиих церквей и соединении всех, Господу помолимся.
О святем храме сем и с верою, благоговением и страхом Божиим входящих в онь, Господу помолимся.
О Великом Господине и отце нашем, Святейшем Патриархе (имярек), и о господине нашем преосвященнейшем митрополите(или архиепископе, или епископе) (имярек), честнем пресвитерстве, во Христе диаконстве и о всем причте и людех, Господу помолимся.
О Богохранимей стране нашей, властех и воинстве ея, Господу помолимся.
О граде сем, (или о веси сей, или о святей обители сей), всяком граде, стране и верою живущих в них, Господу помолимся.
О благорастворении воздухов, о изобилии плодов земных и временех мирных, Господу помолимся.
О плавающих, путешествующих, недугующих, страждущих, плененных и о спасении их, Господу помолимся.
О избавитися нам от всякия скорби, гнева и нужды, Господу помолимся.
Заступи, спаси, помилуй и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.
Хор: Тебе, Господи.
Молитва первого антифона
Иерей. Тайная молитва первого антифона: Господи Боже наш, Егоже держава несказанна и слава непостижима, Егоже милость безмерна и человеколюбие неизреченно. Сам, Владыко, по благоутробию Твоему призри на ны и на святый храм сей, и сотвори с нами и молящимися с нами, богатыя милости Твоя и щедроты Твоя.
Иерей. Возглас: Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.
Хор: Аминь.
Первый изобразительный антифон
1. Благослови, душе моя, Господа. Благословен еси, Господи. Благослови, душе моя, Господа, и вся внутренняя моя Имя святое Его.
2. Благослови, душе моя, Господа, и не забывай всех воздаяний Его.
1. Очищающаго вся беззакония твоя, исцеляющаго вся недуги твоя.
2. Избавляющаго от истления живот твой, венчающаго тя милостию и щедротами.
1. Исполняющаго во благих желание твое: обновится, яко орля, юность твоя.
2. Творяй милостыни Господь, и судьбу всем обидимым.
1. Сказа пути Своя Моисеови, сыновом Израилевым хотения Своя.
2. Щедр и милостив Господь, долготерпелив и многомилостив.
1. Не до конца прогневается, ниже в век враждует.
2. Не по беззаконием нашим сотворил есть нам, ниже по грехом нашим воздал есть нам.
1. Яко по высоте небесней от земли, утвердил есть Господь милость Свою на боящихся Его.
2. Елико отстоят востоцы от запад, удалил есть от нас беззакония наша.
1. Якоже щедрит отец сыны, ущедри Господь боящихся Его.
2. Яко Той позна создание наше, помяну, яко персть есмы.
1. Человек, яко трава дние его, яко цвет сельный, тако оцветет.
2. Яко дух пройде в нем, и не будет, и не познает ктому места своего.
1. Милость же Господня от века и до века на боящихся Его.
2. И правда Его на сынех сынов, хранящих завет Его, и помнящих заповеди Его творити я.
1. Господь на небеси уготова Престол Свой, и Царство Его всеми обладает.
2. Благословите Господа, вси Ангели Его, сильнии крепостию, творящии слово Его, услышати глас словес Его.
1. Благословите Господа, вся силы Его, слуги Его, творящии волю Его.
2. Благословите Господа, вся дела Его, на всяком месте владычества Его.
1. Слава Отцу и Сыну и Святому Духу.
2. И ныне и присно и во веки веков. Аминь.
1. Благослови, душе моя, Господа, и вся внутренняя моя Имя святое Его. Благословен еси, Господи.
Ектения малая
Диакон: Паки и паки, миром Господу помолимся.
Хор: Господи, помилуй. (На каждое прошение)
Заступи, спаси, помилуй и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.
Хор: Тебе, Господи.
Молитва второго антифона
Иерей. Тайная молитва второго антифона: Господи Боже наш, спаси люди Твоя и благослови достояние Твое, исполнение Церкве Твоея сохрани, освяти любящия благолепие дому Твоего. Ты тех воспрослави Божественною Твоею силою и не остави нас, уповающих на Тя.
Иерей. Возглас: Яко Твоя держава и Твое есть Царство и сила, и слава, Отца, и Сына, и Святаго Духа, ныне и присно, и во веки веков.
Хор: Аминь. Слава Отцу и Сыну и Святому Духу.
Второй изобразительный антифон
1. Хвали, душе моя, Господа. Восхвалю Господа в животе моем, пою Богу моему, дондеже есмь.
2. Не надейтеся на князи, на сыны человеческия, в нихже несть спасения.
1. Изыдет дух его, и возвратится в землю свою: в той день погибнут вся помышления его.
2. Блажен, емуже Бог Иаковль помощник его, упование его на Господа Бога своего.
1. Сотворшаго небо и землю, море и вся, яже в них.
2. Хранящаго истину в век, творящаго суд обидимым, дающаго пищу алчущим.
1. Господь решит окованныя, Господь умудряет слепцы.
2. Господь возводит низверженныя, Господь любит праведники.
1. Господь хранит пришельцы, сира и вдову приимет, и путь грешных погубит.
2. Воцарится Господь во век, Бог твой, Сионе, в род и род.
Слава Отцу и Сыну и Святому Духу, и ныне и присно и во веки веков. Аминь.
Песнь Господу Иисусу Христу
Хор: Единородный Сыне и Слове Божий, Безсмертен Сый и изволивый спасения нашего ради воплотитися от Святыя Богородицы и Приснодевы Марии, непреложно вочеловечивыйся, распныйся же, Христе Боже, смертию смерть поправый, Един Сый Святыя Троицы, спрославляемый Отцу и Святому Духу, спаси нас.
Ектения малая
Диакон: Паки и паки, миром Господу помолимся.
Хор: Господи, помилуй. (На каждое прошение)
Заступи, спаси, помилуй и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.
Хор: Тебе, Господи.
Молитва третьего антифона
Иерей. Тайная молитва третьего антифона: Иже общия сия и согласныя даровавый нам молитвы, иже и двема или трем согласующимся о имени Твоем прошения подати обещавый, Сам и ныне раб Твоих прошения к полезному исполни, подая нам и в настоящем веце познание Твоея истины, и в будущем живот вечный даруя.
Иерей. Возглас: Яко благ и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Хор: Аминь.
Третий изобразительный антифон. Блаженны
1. Во Царствии Твоем помяни нас, Господи, егда приидеши, во Царствии Твоем.
1. Блажени нищии духом, яко тех есть Царство Небесное.
2. Блажени плачущии, яко тии утешатся.
1. Блажени кротции, яко тии наследят землю.
2. Блажени алчущии и жаждущии правды, яко тии насытятся.
1. Блажени милостивии, яко тии помиловани будут.
2. Блажени чистии сердцем, яко тии Бога узрят.
1. Блажени миротворцы, яко тии сынове Божии нарекутся.
2. Блажени изгнани правды ради, яко тех есть Царство Небесное.
1. Блажени есте, егда поносят вам, и изженут, и рекут всяк зол глагол на вы, лжуще Мене ради.
2. Радуйтеся и веселитеся, яко мзда ваша многа на Небесех.
1. Слава Отцу и Сыну и Святому Духу.
2. И ныне и присно и во веки веков. Аминь.
Малый вход с Евангелием
Диакон: Господу помолимся.
Хор: Господи, помилуй.
Молитва входа
Иерей. Тайная молитва входа: Владыко Господи Боже наш, уставивый на небесех чины и воинства Ангел и Архангел в служение Твоея славы, сотвори со входом нашим входу святых Ангелов быти, сослужащих нам, и сославословящих Твою благость. Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков. Аминь.
Диакон: Благослови, владыко, святый вход.
Иерей благословляя: Благословен вход святых Твоих, всегда, ныне и присно, и во веки веков.
Диакон: Премудрость, прости.
Входное
Хор: Приидите, поклонимся и припадем ко Христу. Спаси ны, Сыне Божий, Воскресый из мертвых, поющия Ти, аллилуиа. Единожды.
Хор поет тропари и кондаки по Уставу.
Священник же глаголет молитву сию:
Иерей. Тайная молитва: Боже Святый, иже во святых почиваяй, иже трисвятым гласом от Серафимов воспеваемый и от Херувимов славословимый, и от всякия Небесныя Силы покланяемый, иже от небытия во еже быти приведый всяческая, создавый человека по образу Твоему и по подобию, и всяким Твоим дарованием украсивый, даяй просящему премудрость и разум, и не презираяй согрешающаго, но полагаяй на спасение покаяние, сподобивый нас, смиренных и недостойных раб Твоих, и в час сей стати пред славою святаго Твоего жертвенника, и должное Тебе поклонение и славословие приносити. Сам, Владыко, приими и от уст нас, грешных, Трисвятую песнь, и посети ны благостию Твоею, прости нам всякое согрешение вольное же и невольное, освяти наша души и телеса, и даждь нам в преподобии служити Тебе вся дни живота нашего, молитвами святыя Богородицы, и всех святых, от века Тебе благоугодивших.
Диакон иерею: Благослови, владыко, время Трисвятаго.
Иерей благословляя, возглас: Яко свят еси, Боже наш, и Тебе славу возсылаем, Отцу, и Сыну, и Святому Духу, ныне и присно.
Диакон: Господи, спаси благочестивыя. И услыши ны. И во веки веков.
Хор: Аминь.
Трисвятое
Хор: Святый Боже, Святый Крепкий, Святый Безсмертный, помилуй нас. (3 раза)
Иногда читается по гречески:
Άγιος ό Θεός, άγιος ίσχυρός, άγιος αθάνατος, έλέησον ημάς.
А́гиос о Фэо́с, А́гиос исхиро́с, А́гиос афа́натос, эле́исон има́с.
Слава Отцу и Сыну и Святому Духу, и ныне и присно и во веки веков. Аминь.
Святый Безсмертный, помилуй нас.
Святый Боже, Святый Крепкий, Святый Безсмертный, помилуй нас.
Диакон иерею: Повели, владыко.
Иерей: Благословен грядый во имя Господне.
Диакон: Благослови, владыко, Горний престол.
Иерей: Благословен еси на престоле славы Царствия Твоего, Седяй на Херувимех, всегда, ныне и присно, и во веки веков.
Диакон: Вонмем.
Иерей: Мир всем.
Чтец: И духови твоему.
Диакон: Премудрость.
Чтец: Прокимен, псалом Давидов.
ПРОКИМНЫ И АЛЛИЛУИАРИИ ВОСКРЕСНЫЕ.
Глас 1 Буди, Господи, милость Твоя на нас, якоже уповахом на Тя.
Стих: Радуйтеся, праведнии, о Господе, правым подобает похвала.
Аллилуиа: Бог даяй отмщение мне, и покоривый люди под мя.
Стих: Величаяй спасения Царева, и творяй милость Христу своему Давиду, и семени Его до века.
Глас 2 Крепость моя и пение мое Господь, и бысть мне во спасение.
Стих: Наказуя наказа мя Господь, смерти же не предаде мя.
Аллилуиа: Услышит тя Господь в день печали, защитит тя Имя Бога Иаковля.
Стих: Господи, спаси царя, и услыши ны, воньже аще день призовем Тя.
Глас 3 Пойте Богу нашему, пойте, пойте Цареви нашему, пойте.
Стих: Вси языцы восплещите руками, воскликните Богу гласом радования.
Аллилуиа: На Тя, Господи, уповах, да не постыжуся во век.
Стих: Буди ми в Бога Защитителя, и в дом прибежища, еже спасти мя.
Глас 4 Яко возвеличишася дела Твоя, Господи, вся премудростию сотворил еси.
Стих: Благослови душе моя, Господа, Господи Боже мой, возвеличился еси зело.
Аллилуиа: Наляцы, и успевай, и царствуй истины ради, и кротости, и правды.
Стих: Возлюбил еси правду, и возненавидел еси беззаконие.
Глас 5 Ты, Господи, сохраниши ны, и соблюдеши ны от рода сего и во век.
Стих: Спаси мя, Господи, яко оскуде преподобный.
Аллилуиа: Милости Твоя, Господи, во век воспою, в род и род возвещу истину Твою усты моими.
Стих: Зане рекл еси: в век милость созиждется, на небесех уготовится истина Твоя.
Глас 6 Спаси, Господи, люди Твоя, и благослови достояние Твое.
Стих: К Тебе, Господи, воззову, Боже мой, да не премолчиши от мене.
Аллилуиа: Живый в помощи Вышняго, в крове Бога Небеснаго водворится.
Стих: Речет Господеви: заступник мой еси, и прибежище мое, Бог мой, и уповаю на Него.
Глас 7 Господь крепость людем Своим даст, Господь благословит люди Своя миром.
Стих: Принесите Господеви, сынове Божии, принесите Господеви сыны овни.
Аллилуиа: Благо есть исповедатися Господеви, и пети имени Твоему Вышний.
Стих: Возвещати заутра милость Твою, и истину Твою на всяку нощь.
Глас 8 Помолитеся и воздадите Господеви Богу нашему.
Стих: Ведом во Иудеи Бог, во Израили велие Имя Его.
Аллилуиа: Приидите, возрадуемся Господеви, воскликнем Богу Спасителю нашему.
Стих: Предварим лице Его во исповедании, и во псалмех воскликнем Ему.
ПРОКИМНЫ И АЛЛИЛУИАРИИ ДНЕЙ СЕДМИЦЫ.
Понедельник, глас 4: Творяй Ангелы Своя духи и слуги Своя пламень огненный.
Стих: Благослови, душе моя, Господа, Господи Боже мой, возвеличился еси зело.
Аллилуиа, глас 5: Хвалите Господа, вси Ангели Его, хвалите Его, вся силы Его.
Стих: Яко Той рече, и быша; Той повеле, и создашася.
Вторник, глас 7: Возвеселится праведник о Господе, и уповает на Него.
Стих: Услыши Боже глас мой, внегда молити ми ся к Тебе.
Аллилуиа, глас 4: Праведник яко финикс процветет, яко кедр, иже в Ливане, умножится.
Стих: Насаждени в дому Господни, во дворех Бога нашего процветут.
Среда, глас 3: Величит душа Моя Господа, и возрадовася дух Мой о Бозе Спасе Моем.
Стих: Яко призре на смирение Рабы Своея, се бо, отныне ублажат Мя вси роди.
Аллилуиа, глас 8: Слыши, Дщи, и виждь, и приклони ухо Твое.
Стих: Лицу Твоему помолятся богатии людстии.
Четверг, глас 8: Во всю землю изыде вещание их и в концы вселенныя глаголы их.
Стих: Небеса поведают славу Божию, творение же руку Его возвещает твердь.
Аллилуиа, глас 1: Исповедят небеса чудеса Твоя, Господи, ибо истину Твою в Церкви святых.
Стих: Бог прославляем в совете святых.
Пятница, глас 7: Возносите Господа Бога нашего и поклоняйтеся подножию ногу Его, яко свято есть.
Стих: Господь воцарися, да гневаются людие.
Аллилуиа, глас 1: Помяни сонм Твой, егоже стяжал еси исперва.
Стих: Бог же Царь наш прежде века, содела спасение посреде земли.
Суббота, глас 8: Веселитеся о Господе, и радуйтеся праведнии.
Стих: Блажени, ихже оставишася беззакония и ихже прикрышася греси.
Аллилуиа, глас 4: Воззваша праведнии, и Господь услыша их, и от всех скорбей их избави их.
Стих: Многи скорби праведным, и от всех их избавит я Господь.
Заупокойный прокимен, глас 6: Души их во благих водворятся.
Аллилуиа, глас 4: Блажени, яже избрал и приял еси, Господи.
Стих: И память их в род и род.
Диакон: Премудрость.
Чтец: Деяний святых Апостол чтение. (Или: Соборнаго послания Иаковля, или Петрова чтение. Или: К Римляном, или к Коринфяном, или к галатом, или к Тимофею послания святаго Апостола Павла чтение.)
Диакон: Вонмем.
Чтение Апостола
После чтения Иерей: Мир ти.
Чтец: И духови твоему.
Чтец: Аллилуиа.
Хор: Аллилуиа. (3 раза)
Диакон: Премудрость.
Иерей. Тайно. Молитва перед чтением Евангелия: Возсияй в сердцах наших, человеколюбче Владыко, Твоего Богоразумия нетленный свет, и мысленныя наши отверзи очи, во Евангельских Твоих проповеданий разумение. Вложи в нас и страх блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще. Ты бо еси просвещение душ и телес наших, Христе Боже, и Тебе славу возсылаем, со безначальным Твоим Отцем, и пресвятым и благим и животворящим Твоим Духом, ныне и присно, и во веки веков. Аминь.
Диакон: Благослови, владыко, благовестителя святаго Апостола и Евангелиста, (имярек).
Иерей: Бог, молитвами святаго, славнаго, всехвальнаго Апостола и Евангелиста, (имярек), да даст тебе глагол благовествующему силою многою, во исполнение Евангелия возлюбленнаго Сына Своего, Господа нашего Иисуса Христа.
Диакон: Аминь.
Иерей: Премудрость, прости, услышим святаго Евангелия.
Иерей: Мир всем.
Хор: И духови твоему.
Диакон: От (имярек) святаго Евангелия чтение.
Хор: Слава Тебе, Господи, слава Тебе.
Иерей: Вонмем.
Чтение Евангелия
Иерей: Мир ти, благовествующему.
Хор: Слава Тебе, Господи, слава Тебе.
Ектения сугубая
Диакон: Рцем вси от всея души, и от всего помышления нашего рцем.
Хор: Господи, помилуй. (На каждое прошение)
Господи Вседержителю, Боже отец наших, молим Ти ся, услыши и помилуй.
Помилуй нас, Боже, по велицей милости Твоей, молим Ти ся, услыши и помилуй.
Хор: Господи, помилуй. (3 раза) (На каждое прошение)
Еще молимся о Великом Господине и отце нашем, Святейшем Патриархе (имярек), и о господине нашем преосвященнейшем митрополите (или архиепископе, или епископе) (имя рек), и о всей во Христе братии нашей.
Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Еще молимся о братиях наших, священницех, священномонасех, и всем во Христе братстве нашем.
Еще молимся о блаженных и приснопамятных святейших патриарсех православных и создателех святаго храма сего (если в монастыре: святыя обители сея), и о всех прежде почивших отцех и братиях, зде лежащих и повсюду, православных.
Еще молимся о милости, жизни, мире, здравии, спасении, посещении, прощении и оставлении грехов рабов Божиих, братии святаго храма сего (если в монастыре: святыя обители сея).
Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.
Иерей. Тайно. Молитва усердного моления: Господи Боже наш, прилежное сие моление приими от Твоих раб, и помилуй нас по множеству милости Твоея, и щедроты Твоя низпосли на ны и на вся люди Твоя, чающыя от Тебе богатыя милости.
Иерей. Возглас: Яко милостив и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Хор: Аминь.
Заупокойная ектения. В некоторые дни церковного года.
Диакон: Помилуй нас, Боже, по велицей милости Твоей, молим Ти ся, услыши и помилуй.
Хор: Господи, помилуй. (Трижды). (На каждое прошение)
Еще молимся о упокоении душ усопших рабов Божиих имярек, и о еже проститися им всякому прегрешению, вольному же и невольному.
Яко да Господь Бог учинит души их, идеже праведнии упокояются.
Милости Божия, Царства Небеснаго и оставления грехов их у Христа, безсмертнаго Царя и Бога нашего, просим.
Хор: Подай, Господи.
Диакон: Господу помолимся.
Хор: Господи, помилуй.
Иерей. Тайно, Молитва об усопших: Боже духов, и всякия плоти, смерть поправый и диавола упразднивый, и живот миру Твоему даровавый: Сам, Господи, покой души усопших раб Твоих, имярек, в месте светле, в месте злачне, в месте покойне, отнюдуже отбеже болезнь, печаль и воздыхание. Всякое согрешение, содеянное ими словом, или делом, или помышлением, яко благий человеколюбец Бог, прости. Яко несть человек, иже жив будет и не согрешит. Ты бо Един кроме греха, правда Твоя правда во веки, и слово Твое истина.
Иерей. Возглас: Яко Ты еси воскресение и живот и покой усопших раб Твоих, имярек, Христе Боже наш, и Тебе славу возсылаем, со безначальным Твоим Отцем, и пресвятым и благим и животворящим Твоим Духом, ныне и присно, и во веки веков.
Хор: Аминь.
Ектения об оглашенных
Диакон: Помолитеся, оглашеннии, Господеви.
Хор: Господи, помилуй. (На каждое прошение)
Вернии, о оглашенных помолимся, да Господь помилует их.
Огласит их словом истины.
Открыет им Евангелие правды.
Соединит их святей Своей соборней и апостольстей Церкви.
Спаси, помилуй, заступи и сохрани их, Боже, Твоею благодатию.
Оглашеннии, главы ваша Господеви приклоните.
Хор: Тебе, Господи.
Иерей. Тайно. Молитва об оглашаемых: Господи Боже наш, иже на высоких живый и на смиренныя призираяй, иже спасение роду человеческому низпославый, Единороднаго Сына Твоего и Бога, Господа нашего Иисуса Христа, призри на рабы Твоя оглашенныя, подклоньшия Тебе Своя выя, и сподоби я во время благополучное бани пакибытия, оставления грехов и одежди нетления, соедини их святей Твоей соборней и апостольстей Церкви, и сопричти их избранному Твоему стаду.
Иерей. Возглас: Да и тии с нами славят пречестное и великолепое имя Твое, Отца, и Сына, и Святаго Духа, ныне и присно, и во веки веков.
Хор: Аминь.
Иерей простирает антиминс.
Диакон: Елицы оглашеннии, изыдите, оглашеннии изыдите, елицы оглашеннии изыдите. Да никто от оглашенных, елицы вернии, паки и паки миром Господу помолимся.
Хор: Господи, помилуй.
ЛИТУРГИЯ ВЕРНЫХ
Диакон: Заступи, спаси, помилуй и сохрани нас, Боже, Твоею благодатию.
Хор: Господи, помилуй.
Диакон: Премудрость.
Иерей. Тайно. Молитва верных первая: Благодарим Тя, Господи Боже Сил, сподобившаго нас предстати и ныне святому Твоему жертвеннику, и припасти ко щедротам Твоим о наших гресех и о людских неведениих. Приими, Боже, моление наше, сотвори ны достойны быти, еже приносити Тебе моления и мольбы, и жертвы безкровныя о всех людех Твоих. И удовли нас, ихже положил еси в службу Твою сию, силою Духа Твоего Святаго, неосужденно и непреткновенно в чистем свидетельстве совести нашея, призывати Тя на всякое время и место. Да послушая нас, милостив нам будеши, во множестве Твоея благости.
Иерей. Возглас: Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.
Хор: Аминь.
Диакон: Паки и паки, миром Господу помолимся.
Хор: Господи, помилуй. (На каждое прошение)
[Если священник служит один, это не произносит:
О свышнем мире и спасении душ наших, Господу помолимся.
О мире всего мира, благостоянии святых Божиих церквей и соединении всех, Господу помолимся.
О святем храме сем и с верою, благоговением и страхом Божиим входящих в онь, Господу помолимся.
О избавитися нам от всякия скорби, гнева и нужды, Господу помолимся.]
Заступи, спаси, помилуй и сохрани нас, Боже, Твоею благодатию.
Диакон: Премудрость.
Иерей. Тайною Молитва верных вторая: Паки и многажды Тебе припадаем, Тебе молимся, Благий и Человеколюбче, яко да призрев на моление наше, очистиши наша души и телеса от всякия скверны плоти и духа, и даси нам неповинное и неосужденное предстояние святаго Твоего жертвенника. Даруй же Боже, и молящимся с нами преспеяние жития и веры и разума духовнаго. Даждь им всегда со страхом и любовию служащим Тебе, неповинно и неосужденно причаститися святых Твоих Таин и Небеснаго Твоего Царствия сподобитися.
Иерей. Возглас: Яко да под державою Твоею всегда храними, Тебе славу возсылаем, Отцу, и Сыну, и Святому Духу, ныне и присно, и во веки веков.
Хор: Аминь.
Отверзаются Царские врата.
Херувимская песнь
Хор: Иже Херувимы тайно образующе и животворящей Троице Трисвятую песнь припевающе, всякое ныне житейское отложим попечение.
Иерей. Тайно. Молитва Херувимской песни: Никтоже достоин от связавшихся плотскими похотьми и сластьми приходити, или приближитися, или служити Тебе, Царю Славы: еже бо служити Тебе, велико и страшно и самем Небесным Силам. Но обаче неизреченнаго ради и безмернаго Твоего человеколюбия, непреложно и неизменно был еси Человек, и Архиерей нам был еси: и служебныя сея и безкровныя жертвы священнодействие предал еси нам, яко Владыка всех. Ты бо един, Господи Боже наш, владычествуеши небесными и земными, иже на престоле Херувимсте носимый, иже Серафимов Господь, и Царь Израилев, иже Един свят, и во святых почиваяй. Тя убо молю, Единаго благаго и благопослушливаго: призри на мя, грешнаго и непотребнаго раба Твоего, и очисти мою душу и сердце от совести лукавыя, и удовли мя, силою святаго Твоего Духа, облечена благодатию священства, предстати святей Твоей сей трапезе, и священнодействовати Святое и Пречистое Твое Тело и Честную Кровь. К Тебе бо прихожду приклонь мою выю, и молю Ти ся, да не отвратиши лица Твоего от мене, ниже отринеши мене от отрок Твоих, но сподоби принесенным Тебе быти, мною грешным и недостойным рабом Твоим, даром сим. Ты бо еси приносяй и приносимый, и приемляй и раздаваемый, Христе Боже наш, и Тебе славу возсылаем, со безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков. Аминь.
Великий вход
Диакон: Великаго господина и отца нашего имярек, Святейшаго Патриарха Московскаго и всея Руси, и господина нашего преосвященнейшаго (имярек), митрополита (или архиепископа, или епископа егоже есть область), да помянет Господь Бог во Царствии Своем всегда, ныне и присно, и во веки веков.
Иерей: Преосвященныя митрополиты, архиепископы и епископы, и весь священнический и монашеский чин, причет святаго храма сего, и всех вас православных христиан, да помянет Господь Бог во Царствии Своем, всегда, ныне и присно, и во веки веков.
Хор: Аминь.
Вторая часть Херувимския песни: Яко да Царя всех подымем, ангельскими невидимо дориносима чинми. Аллилуиа, аллилуиа, аллилуиа.
Диакон: Да помянет Господь Бог священство твое во Царствии Своем, всегда, ныне и присно, и во веки веков.
Иерей: Да помянет Господь Бог священнодиаконство твое во Царствии Своем, всегда, ныне и присно, и во веки веков.
Иерей ставит Потир на престол со словами: Благообразный Иосиф, с древа снем Пречистое Тело Твое, плащаницею чистою обвив, и благоуханьми во гробе нове покрыв, положи.
Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом, вся исполняяй неописанный.
Яко живоносец, яко рая краснейший, воистинну и чертога всякаго царскаго показася светлейший, Христе, гроб Твой, источник нашего воскресения.
Иерей покрывает воздухом Святые дары со словами: Благообразный Иосиф, с древа снем Пречистое Тело Твое, плащаницею чистою обвив, и благоуханьми во гробе нове покрыв, положи.
Затем иерей калит со словами: Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая, тогда возложат на олтарь Твой тельцы.
Иерей диакону: Помяни мя, брате и сослужителю.
Диакон к иерею: Да помянет Господь Бог священство твое во Царствии Своем. Помолися о мне, владыко святый.
Иерей: Дух Святый найдет на тя, и Сила Вышняго осенит тя.
Диакон: Тойже Дух содействует нам вся дни живота нашего. Помяни мя, владыко святый.
Иерей: Да помянет тя Господь Бог во Царствии Своем, всегда, ныне и присно, и во веки веков.
Диакон: Аминь.
Затворяются Царская врата.
Ектения просительная
Диакон: Исполним молитву нашу Господеви.
Хор: Господи, помилуй. (На каждое прошение)
О предложенных Честных Дарех, Господу помолимся.
О святем храме сем, и с верою, благоговением и страхом Божиим входящих в онь, Господу помолимся.
О избавитися нам от всякия скорби, гнева и нужды, Господу помолимся.
Заступи, спаси, помилуй и сохрани нас, Боже, Твоею благодатию.
Дне всего совершенна, свята, мирна и безгрешна, у Господа просим.
Хор: Подай, Господи. (На каждое прошение)
Ангела мирна, верна наставника, хранителя душ и телес наших, у Господа просим.
Прощения и оставления грехов и прегрешений наших, у Господа просим.
Добрых и полезных душам нашим, и мира мирови, у Господа просим.
Прочее время живота нашего в мире и покаянии скончати, у Господа просим.
Христианския кончины живота нашего, безболезненны, непостыдны, мирны и добраго ответа на страшнем судищи Христове просим.
Пресвятую, пречистую, преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.
Хор: Тебе, Господи.
Иерей. Тайно. Молитва приношения: Господи Боже Вседержителю, Едине святе, приемляй жертву хваления от призывающих Тя всем сердцем. Приими и нас, грешных, моления и принеси ко святому Твоему жертвеннику, и удовли нас приносити Тебе дары же и жертвы духовныя о наших гресех и о людских неведениих, и сподоби нас обрести благодать пред Тобою, еже быти Тебе благоприятней жертве нашей, и вселитися Духу благодати Твоея благому в нас, и на предлежащих Дарех сих, и на всех людех Твоих.
Иерей. Возглас: Щедротами Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно, и во веки веков.
Хор: Аминь.
Иерей: Мир всем.
Хор: И духови твоему.
Диакон: Возлюбим друг друга, да единомыслием исповемы.
Хор: Отца, и Сына, и Святаго Духа, Троицу единосущную и нераздельную.
Иерей. Тайно: Возлюблю Тя, Господи, крепосте моя, Господь утверждение мое и прибежище мое. (3 раза).
Иерей и священнослужители в алтаре: Христос посреде нас. И есть, и будет.
Диакон: Двери, двери, премудростию вонмем.
Священник колеблет воздух над Честными.
Символ веры
Верую во единаго Бога Отца Вседержителя, Творца небу и земли, видимым же всем и невидимым.
И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век. Света от Света, Бога истинна от Бога истинна, рожденна, несотворенна, единосущна Отцу, Имже вся быша.
Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася.
Распятаго же за ны при Понтийстем Пилате, и страдавша, и погребенна.
И воскресшаго в третий день по Писанием.
И возшедшаго на небеса, и седяща одесную Отца.
И паки грядущаго со славою судити живым и мертвым, Егоже Царствию не будет конца.
И в Духа Святаго, Господа, Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки.
Во едину Святую, Соборную и Апостольскую Церковь.
Исповедую едино крещение во оставление грехов.
Чаю воскресения мертвых,
и жизни будущаго века. Аминь.
Святое Возношение.
Диакон: Станем добре, станем со страхом, вонмем, святое возношение в мире приносити.
Хор: Милость мира, жертву хваления.
Евхаристический канон
Иерей: Благодать Господа нашего Иисуса Христа, и любы Бога и Отца, и причастие Святаго Духа, буди со всеми вами.
Хор: И со духом твоим.
Иерей: Горе имеим сердца.
Хор: Имамы ко Господу.
Иерей: Благодарим Господа.
Хор: Достойно и праведно есть покланятися Отцу и Сыну, и Святому Духу, Троице единосущней и нераздельней.
Иерей. Тайно: Достойно и праведно Тя пети, Тя благословити, Тя хвалити, Тя благодарити, Тебе покланятися на всяком месте владычествия Твоего. Ты бо еси Бог неизреченен, недоведомь, невидимь, непостижимь, присно сый, такожде сый, Ты и Единородный Твой Сын, и Дух Твой Святый. Ты от небытия в бытие нас привел еси, и отпадшия возставил еси паки, и не отступил еси вся творя, дондеже нас на небо возвел еси, и Царство Твое даровал еси будущее. О сих всех благодарим Тя и Единороднаго Твоего Сына, и Духа Твоего Святаго, о всех, ихже вемы, и ихже не вемы, явленных и неявленных благодеяниих бывших на нас. Благодарим Тя и о службе сей, юже от рук наших прияти изволил еси. Аще и предстоят Тебе тысящи Архангелов и тмы Ангелов, Херувими и Серафими шестокрилатии, многоочитии, возвышащиися пернатии.
Возглас: Победную песнь поюще, вопиюще, взывающе и глаголюще.
Хор: Свят, свят, свят Господь Саваоф, исполнь небо и земля славы Твоея; осанна в вышних, благословен Грядый во имя Господне, осанна в вышних.
Иерей. Тайно: С сими и мы блаженными Силами, Владыко человеколюбче, вопием и глаголем: свят еси и пресвят, Ты и Единородный Твой Сын, и Дух Твой Святый. Свят еси и пресвят, и великолепна слава Твоя, иже мир Твой тако возлюбил еси, якоже Сына Твоего Единороднаго дати: да всяк веруяй в Него не погибнет, но имать живот вечный. Иже пришед, и все еже о нас смотрение исполнив, в нощь в нюже предаяшеся, паче же Сам Себе предаяше за мирский живот, прием хлеб во святыя Своя и пречистыя и непорочныя руки, благодарив и благословив, освятив, преломив, даде святым Своим учеником и Апостолом, рек:
Возглас: Приимите, ядите, сие есть Тело Мое, еже за вы ломимое во оставление грехов.
Хор: Аминь.
Иерей. Тайно: Подобне и чашу по вечери, глаголя:
Возглас: Пийте от нея вси, сия есть Кровь Моя Новаго Завета, яже за вы и за многия изливаемая, во оставление грехов.
Хор: Аминь.
Иерей. Тайно. Анамнезис: Поминающе убо спасительную сию заповедь, и вся яже о нас бывшая: Крест, гроб, тридневное воскресение, на небеса восхождение, одесную седение, второе и славное паки пришествие.
Возглас: Твоя от Твоих Тебе приносяще, о всех и за вся.
Преложение Святых Даров
Хор: Тебе поем, Тебе благословим, Тебе благодарим, Господи, и молим Ти ся, Боже наш.
Иерей. Тайно: Еще приносим Ти словесную сию и безкровную службу, и просим, и молим, и мили ся деем, низпосли Духа Твоего Святаго на ны, и на предлежащия Дары Сия.
Господи, иже Пресвятаго Твоего Духа в третий час Апостолом Твоим низпославый, Того, Благий, не отими от нас, но обнови нас, молящих Ти ся.
Иерей. Тайно. Эпиклезис: Еще приносим Ти словесную сию и безкровную службу, и просим, и молим, и мили ся деем, низпосли Духа Твоего Святаго на ны, и на предлежащия Дары Сия.
Иерей: Господи, иже Пресвятаго Твоего Духа в третий час Апостолом Твоим низпославый, Того, Благий, не отими от нас, но обнови нас, молящих Ти ся.
Диакон: Сердце чисто созижди во мне, Боже, и дух прав обнови во утробе моей.
Иерей: Господи, иже Пресвятаго Твоего Духа в третий час Апостолом Твоим низпославый, Того, Благий, не отими от нас, но обнови нас, молящих Ти ся.
Диакон: Не отвержи мене от лица Твоего, и Духа Твоего Святаго не отими от мене.
Иерей: Господи, иже Пресвятаго Твоего Духа в третий час Апостолом Твоим низпославый, Того, Благий, не отими от нас, но обнови нас, молящих Ти ся.
Диакон: преклонив главу и показуя орарем на Святый Хлеб, говорит иерею:
Благослови, владыко, святый хлеб.
Иерей: поклонившись, благословляет Святый Хлеб, говоря:
И сотвори убо хлеб сей Честное Тело Христа Твоего.
Диакон: Аминь. Благослови, владыко, Святую Чашу.
Иерей: благословляя Святую Чашу, говорит:
А еже в Чаши сей – а Честную Кровь Христа Твоего.
Диакон: Аминь.
Иерей: Излиянную за живот мира.
Диакон: Аминь.
Диакон: Аминь. Благослови, владыко, обоя.
Иерей: благословляя Святые Дары вместе говорит:
Преложив Духом Твоим Святым.
Диакон: Аминь, аминь, аминь.
Священнослужители делают земной поклон.
Диакон: Помяни мя, святый владыко, грешнаго.
Иерей: Да помянет Тя Господь Бог во Царствии Своем всегда, ныне и присно, и во веки веков.
Диакон: Аминь.
Иерей: Якоже быти причащающимся во трезвение души, во оставление грехов, в приобщение Святаго Твоего Духа, во исполнение Царствия Небеснаго, в дерзновение еже к Тебе, не в суд, или во осуждение.
Еще приносим Ти словесную сию службу, о иже в вере почивших, праотцех, отцех, патриарсех, пророцех, Апостолех, проповедницех, евангелистех, мученицех, исповедницех, воздержницех, и о всяком дусе праведнем в вере скончавшемся.
Иерей: Изрядно о Пресвятей, Пречистей, Преблагословенней, Славней Владычице нашей Богородице и Приснодеве Марии.
Хор: Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Конец Евхаристического канона.
Иерей. Тайная молитва: О святем Иоанне Пророце, Предтечи и Крестители, о святых славных и всехвальных Апостолех, о святем имярек, егоже и память совершаем, и о всех святых Твоих, ихже молитвами посети нас, Боже.
И помяни всех усопших о надежди воскресения жизни вечныя. (называет имена). И упокой их, идеже присещает свет лица Твоего.
Еще молим Тя, помяни, Господи, всякое епископство православных, право правящих слово Твоея истины, всякое пресвитерство, во Христе диаконство и всякий священнический чин. Еще приносим Ти словесную сию службу о вселенней, о святей, соборней и апостольстей Церкви, о иже в чистоте и честнем жительстве пребывающих, о Богохранимей стране нашей, властех и воинстве ея. Даждь им, Господи, мирное правление, да и мы в тишине их тихое и безмолвное житие поживем, во всяком благочестии и чистоте.
Возглас: В первых помяни, Господи, великаго господина и отца нашего (имярек), Святейшаго Патриарха Московскаго и всея Руси, и господина нашего преосвященнаго имярек, митрополита (или архиепископа, или епископа, егоже есть область), ихже даруй святым Твоим церквам, в мире, целых, честных, здравых, долгоденствующих, право правящих слово Твоея истины.
Хор: И всех, и вся.
Иерей. Тайная молитва: Помяни Господи град сей, в немже живем, (или весь сию, в нейже живем, или обитель сию, в нейже живем), и всякий град и страну, и верою живущих в них.
Помяни, Господи, плавающих, путешествующих, недугующих, страждущих, плененных, и спасение их.
Помяни, Господи, плодоносящих и добротворящих во святых Твоих церквах, и поминающих убогия, и на вся ны милости Твоя низпосли.
И поминает по именам, ихже хощет, живых.
Возглас: И даждь нам единеми усты и единем сердцем славити и воспевати пречестное и великолепое имя Твое, Отца, и Сына, и Святаго Духа, ныне и присно, и во веки веков.
Хор: Аминь.
Иерей обращься ко дверем и благословляя: И да будут милости великаго Бога и Спаса нашего Иисуса Христа со всеми вами.
Хор: И со духом твоим.
Ектения просительная
Диакон: Вся святыя помянувше, паки и паки миром Господу помолимся.
Хор: Господи, помилуй. (На каждое прошение)
О принесенных и освященных Честных Дарех, Господу помолимся.
Яко да человеколюбец Бог наш, прием я во святый и пренебесный и мысленный Свой жертвенник, в воню благоухания духовнаго, возниспослет нам Божественную благодать и дар Святаго Духа, помолимся.
О избавитися нам от всякия скорби, гнева и нужды, Господу помолимся.
Заступи, спаси, помилуй и сохрани нас, Боже, Твоею благодатию.
Дне всего совершенна, свята, мирна и безгрешна, у Господа просим.
Хор: Подай, Господи. (На каждое прошение)
Ангела мирна, верна наставника, хранителя душ и телес наших, у Господа просим.
Прощения и оставления грехов и прегрешений наших, у Господа просим.
Добрых и полезных душам нашим, и мира мирови, у Господа просим.
Прочее время живота нашего в мире и покаянии скончати, у Господа просим.
Христианския кончины живота нашего, безболезнены, непостыдны, мирны, и добраго ответа на страшнем судищи Христове просим.
Соединение веры и причастие Святаго Духа испросивше, сами себе, и друг друга, и весь живот наш Христу Богу предадим.
Хор: Тебе, Господи.
Молитва перед св. Причащением
Иерей. Тайная молитва: Тебе предлагаем живот наш весь и надежду, Владыко человеколюбче, и просим, и молим, и мили ся деем, сподоби нас причаститися Небесных Твоих и страшных Таин, сея Священныя и Духовныя Трапезы, с чистою совестию, во оставление грехов, в прощение согрешений, во общение Духа Святаго, в наследие Царствия Небеснаго, в дерзновение еже к Тебе, не в суд или во осуждение.
Возглас: И сподоби нас, Владыко, со дерзновением, неосужденно смети призывати Тебе, Небеснаго Бога Отца, и глаголати.
Хор: Отче наш, Иже еси на небесех, да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Иерей: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.
Хор: Аминь.
Иерей: Мир всем.
Хор: И духови твоему.
Диакон: Главы ваша Господеви приклоните.
Хор: Тебе, Господи.
После этого все, кто не Причащается должны покинуть храм
Иерей. Тайная молитва главопреклонения: Благодарим Тя, Царю невидимый, иже неисчетною Твоею силою вся содетельствовал еси, и множеством милости Твоея от небытия в бытие вся привел еси. Сам, Владыко, с небесе призри на подклоньшия Тебе главы своя, не бо подклониша плоти и крови, но Тебе страшному Богу. Ты убо Владыко, предлежащая всем нам во благое изравняй, по коегождо своей потребе: плавающим сплавай, путешествующим спутешествуй, недугующия исцели, Врачу душ и телес.
Возглас: Благодатию, и щедротами, и человеколюбием Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно, и во веки веков.
Хор: Аминь.
Иерей. Тайная молитва: Вонми, Господи Иисусе Христе Боже наш, от святаго жилища Твоего, и от престола славы Царствия Твоего, и прииди во еже освятити нас, иже горе со Отцем седяй, и зде нам невидимо спребываяй. И сподоби державною Твоею рукою преподати нам Пречистое Тело Твое и Честную Кровь, и нам и всем людем.
Диакон, стоя пред царскими вратами, препоясуется орарем крестообразно, показывая этим готовность послужить при совершении Святой Евхаристии.
Иерей тайно: Боже, очисти мя, грешнаго, и помилуй мя. (И 3 поклона)
Диакон тайно: Боже, очисти мя, грешнаго, и помилуй мя. (И 3 поклона)
Закрывются Царские врата завесой.
Диакон: Вонмем.
Священник берет Святый Агнец и, вознося (поднимая) его над дискосом, возглашает:
Святая-святым!
Хор: Един свят, един Господь, Иисус Христос, во славу Бога Отца. Аминь.
Диакон иерею: Раздроби, владыко, Святый Хлеб.
Иерей, разламывает Святой Хлеб по надрезу на четыре части, тихо произнося: Раздробляется и разделяется Агнец Божий, раздробляемый и неразделяемый, всегда ядомый и никогдаже иждиваемый, но причащающияся освящаяй.
Диакон иерею: Исполни, владыко, святый потир.
Священник, взяв частицу ИС и сотворив ею знамение креста над потиром, опускает ее в потир со словами:Исполнение Духа Святаго.
Диакон: Аминь.
Диакон взяв ковшец с теплотой, подносит его иерею, говоря: Благослови, владыко, теплоту.
Иерей, благословляя, говорит: Благословена теплота святых Твоих всегда, ныне и присно, и во веки веков. Аминь.
Диакон вливает теплоту в Потир, говоря: Теплота веры, исполнь Духа Святаго. Аминь.
Причащение священнослужителей в алтаре.
Хор поет Причастны:
В воскресенье:
Хвалите Господа с небес, хвалите Его в вышних. Аллилуиа, аллилуиа, аллилуиа.
В понедельник св. Бесплотным силам:
Творяй Ангелы Своя духи, и слуги Своя пламень огненный. Аллилуиа, аллилуиа, аллилуиа.
Во вторник святому Иоанну Предтече:
В память вечную будет праведник, от слуха зла не убоится. Аллилуиа, аллилуиа, аллилуиа.
В среду Пресвятой Богородице:
Чашу спасения прииму и имя Господне призову. Аллилуиа, аллилуиа, аллилуиа.
В четверг святым апостолам:
Во всю землю изыде вещание их, и в концы вселенныя глаголы их. Аллилуиа, аллилуиа, аллилуиа.
В пятницу святому Кресту:
Спасение соделал еси посреде земли, Боже. Аллилуиа, аллилуиа, аллилуиа.
В субботу всем святым:
Радуйтеся, праведнии, о Господе, правым подобает похвала. Аллилуиа, аллилуиа, аллилуиа.
И заупокойный:
Блажени, яже избрал и приял еси, Господи, и память их в род и род. Аллилуиа, аллилуиа, аллилуиа.
Причащение народа в храме.
Диакон, выйдя вместе с иереем на солею, возглашает: Со страхом Божиим и верою приступите!
И передает Святую Чашу священнику.
Хор: Благословен Грядый во имя Господне, Бог Господь и явися нам.
Священник читает молитву: Верую, Господи, и исповедую, яко Ты еси воистинну Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сие есть самое пречистое Тело Твое, и сия есть самая честная Кровь Твоя. Молюся убо Тебе: помилуй мя и прости ми прегрешения моя, вольная и невольная, яже словом, яже делом, яже ведением и неведением, и сподоби мя неосужденно причаститися пречистых Твоих Таинств, во оставление грехов и в жизнь вечную. Аминь.
Таже: Вечери Твоея тайныя днесь, Сыне Божий, причастника мя приими; не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем.
Да не в суд или во осуждение будет мне причащение Святых Твоих Таин, Господи, но во исцеление души и тела.
По окончании чтения молитвы причастники-миряне полагают земной поклон, подходят к Святой Чаше с благоговением, крестообразно сложив руки на груди, и называют свои имена. У Чаши во избежание пролития Святой Крови не полагается креститься.
Иерей, подавая Святые Дары, произносит: Причащается раб Божий (имя рек) Честнаго и Святаго Тела и Крове Господа и Бога и Спаса нашего Иисуса Христа, во оставление грехов своих и в жизнь вечную.
Диакон или алтарный служитель отирает платом уста причащающихся, а причастившиеся, поцеловав, если возможно, с благоговением и осторожностью край Святой Чаши, отходят и приемлют теплоту.
Хор: Тело Христово приимите, Источника безсмертнаго вкусите. Аллилуиа. Трижды.
После причащения мирян священник с диаконов входят в алтарь.
Священник ставит Святую Чашу на престол и, взяв дискос и читая воскресные песнопения:
Воскресение Христово видевше, поклонимся Святому Господу Иисусу, Единому Безгрешному. Кресту Твоему покланяемся, Христе, и Святое Воскресение Твое поем и славим: Ты бо еси Бог наш, разве Тебе иного не знаем, Имя Твое именуем. Приидите, вси вернии, поклонимся Святому Христову Воскресению, се бо прииде Крестом радость всему миру. Всегда благословяще Господа, поем Воскресение Его, распятие бо претерпев, смертию смерть разруши.
Светися, светися, Новый Иерусалиме! Слава бо Господня на тебе возсия. Ликуй ныне и веселися, Сионе! Ты же, Чистая, красуйся, Богородице, о востании Рождества Твоего.
О Пасха велия и священнейшая, Христе! О Мудросте, и Слове Божий, и Сило! Подавай нам истее Тебе причащатися в невечернем дни Царствия Твоего,- опускает в потир частицы, вынутые из просфор, лежащих на дискосе, со словами: «Отмый, Господи грехи поминавшихся зде Кровию Твоею Честною, молитвами святых Твоих.
Антиминсной губкой священник отирает дискос, чтобы не осталось на нем и самых мельчайших частичек. После опускания частиц в потир он покрывает Святую Чашу покровцем, а на дискос полагает звездицу, копие, лжицу, второй покровец и плат.
Иерей же благословляет людей, возглашая: Спаси, Боже, люди Твоя, и благослови достояние Твое.
Иерей кадит Святые Дары, говоря тайно: Вознесися на небеса, Боже, и по всей земли слава Твоя
Иерей отдает диакону дискос, и диакон несет дискос на жертвенник.
Хор: Видехом свет истинный, прияхом Духа Небеснаго, обретохом веру истинную, нераздельней Троице покланяемся, Та бо нас спасла есть.
Иерей, поклонившись Святым Дарам, берет Святую Чашу, говоря тихо: Благословен Бог наш.
Иерей, возглас: Всегда, ныне и присно, и во веки веков.
Иерей относит Святую Чашу на жертвенник.
Хор: Аминь.
Хор: Да исполнятся уста наша хваления Твоего Господи, яко да поем славу Твою, яко сподобил еси нас причаститися Святым Твоим, Божественным, безсмертным и животворящим Тайнам, соблюди нас во Твоей святыни весь день поучатися правде Твоей. Аллилуиа, аллилуиа, аллилуиа.
Диакон: Прости приимше Божественных, святых, пречистых, безсмертных, небесных и животворящих, страшных Христовых Таин, достойно благодарим Господа.
Хор: Господи, помилуй. (На каждое прошение)
Заступи, спаси, помилуй и сохрани нас, Боже, Твоею благодатию.
День весь совершен, свят, мирен и безгрешен испросивше, сами себе и друг друга, и весь живот наш Христу Богу предадим.
Хор: Тебе, Господи.
Благодарственная молитва
Иерей. Тайно. Благодарственная молитва: Благодарим Тя, Владыко человеколюбче, Благодетелю душ наших, яко и в настоящий день сподобил еси нас небесных Твоих и безсмертных Таинств. Исправи наш путь, утверди ны во страсе Твоем вся, соблюди наш живот, утверди наша стопы, молитвами и моленьми славныя Богородицы и Приснодевы Марии, и всех святых Твоих.
Иерей. Возглас: Яко Ты еси освящение наше, и Тебе славу возсылаем, Отцу, и Сыну, и Святому Духу, ныне и присно, и во веки веков.
Хор: Аминь.
Иерей же, согнув антиминс и прямо держа Евангелие, творит над ним крест.
Иерей: С миром изыдем.
Хор: О имени Господни.
Диакон: Господу помолимся.
Хор: Господи, помилуй.
Молитва заамвонная.
Иерей: Благословляяй благословящия Тя, Господи, и освящаяй на Тя уповающия, спаси люди Твоя и благослови достояние Твое, исполнение Церкве Твоея сохрани, освяти любящия благолепие дому Твоего: Ты тех возпрослави Божественною Твоею силою, и не остави нас, уповающих на Тя. Мир мирови Твоему даруй, церквам Твоим, священником, воинству и всем людем Твоим. Яко всякое даяние благо, и всяк дар совершен свыше есть, сходяй от Тебе Отца светов, и Тебе славу, и благодарение, и поклонение возсылаем, Отцу, и Сыну, и Святому Духу, ныне и присно, и во веки веков.
Хор: Аминь.
Иерей. Молитва на потребление Святых Даров: Исполнение закона и пророков Сам сый Христе Боже наш, исполнивый все отеческое смотрение, исполни радости и веселия сердца наша, всегда, ныне и присно, и во веки веков.
Хор: Аминь.
Хор: Буди имя Господне благословено от ныне и до века. (3 раза)
Хор: Псалом 33:
Благословлю Господа на всякое время, выну хвала Его во устех моих. О Господе похвалится душа моя, да услышат кротцыи и возвеселятся. Возвеличите Господа со мною и вознесем имя Его вкупе. Взысках Господа и услыша мя, и от всех скорбей моих избави мя. Приступите к Нему и просветитеся, и лица ваша не постыдятся. Сей нищий воззва, и Господь услыша и, и от всех скорбей eго спасе и. Ополчится Ангел Господень окрест боящихся Его, и избавит их. Вкусите и видите, яко благ Господь; блажен муж, иже уповает Нань. Бойтеся Господа, вси святии Его, яко несть лишения боящимся Его. Богатии обнищаша и взалкаша, взыскающии же Господа не лишатся всякаго блага. Приидите, чада, послушайте мене, страху Господню научу вас. Кто есть человек хотяй живот, любяй дни видети благи? Удержи язык твой от зла, и устне твои, еже не глаголати льсти. Уклонися от зла, и сотвори благо. Взыщи мира, и пожени и. Очи Господни на праведныя, и уши Его в молитву их. Лице же Господне на творящия злая, еже потребити от земли память их. Воззваша праведнии, и Господь услыша их, и от всех скорбей их избави их. Близ Господь сокрушенных сердцем, и смиренныя духом спасет. Многи скорби праведным, и от всех их избавит я Господь. Хранит Господь вся кости их, ни едина от них сокрушится. Смерть грешников люта, и ненавидящии праведнаго прегрешат. Избавит Господь душы раб Своих, и не прегрешат вси, уповающии на Него.
Иерей благословляет молящихся, возглашая: Благословение Господне на вас, Того благодатию и человеколюбием всегда, ныне и присно, и во веки веков.
Хор: Аминь.
Иерей: Слава Тебе, Христе Боже, упование наше, слава Тебе.
Хор:
Слава: и Ныне:
Господи, помилуй. (3 раза)
Благослови.
Отпуст
Иерей: Воскресый из мертвых Христос, истинный Бог наш, молитвами Пречистыя Своей Матере, святых славных и всехвальных апостол, иже во святых отца нашего Иоанна, архиепископа Константинопольскаго, Златоустаго и святаго (храма и дня), и всех святых, помилует и спасет нас, яко Благ и Человеколюбец.
Многолетие
Хор: Великого Господина и Отца нашего (имярек), Святейшего Патриарха Московского и всея Руси, и Господина нашего Преосвященнейшаго (имя рек) митрополита (или архиепископа или епископа; титул епархиального архиерея), братию святаго храма сего и вся православныя христианы, Господи, сохрани их на многая лета.
Количество просмотров — 21632
